ОТА ВА ОНАНИНГ ДЎСТЛАРИГА ЯХШИЛИК ҚИЛИШНИНГ ФАЗИЛАТИ
30 - عَنِ ابْنِ عُمَرَ رَضِيَ اللهُ عَنْهُمَا أَنَّ النَّبِيَّ صَلَّى اللهُ عَلَيهِ وَسَلَّمَ قَالَ: «إِنَّ أَبَرَّ البِرِّ أَنْ يَصِلَ الرَّجُلُ وُدَّ أَبِيهِ».
- Ибн Умар розияллоҳу анҳудан ривоят қилинади:
Набий соллаллоҳу алайҳи васаллам:
«Киши отасининг дўстлари билан (борди-келди) алоқаларини қилиши яхшиликларнинг олийсидир», дедилар. (Муҳаддис исми)
Шарҳ: Агар мусулмон киши ота- онаси вафотидан кейин ҳам уларга яхшилик қилишни истаса, ота- оналари яхши кўрган инсонлар билан борди- келди алоқаларини тиклайди. Инсон отаси ёки онасининг дўстларини зиёрат қилар экан, бу уларга тақдим қилаётган яхшилигидир. Ушбу ва шу мазмундаги бошқа ҳадисларда келишича, ота- оналарга фақат уларнинг ҳаётлик пайтларидагина яхшилик қилинмайди. Балки вафот этишгандан кейин, уларнинг яқин дўстлари тирик экан, улар билан алоқани тутишда бардавом бўлинади.
Саҳобаларнинг биридан ривоят қилинади. У: "Эй Аллоҳнинг расули, ота- онам вафот қилишганидан кейин уларга нисбатан бирор яхшилик қолдими?" деганида, у зот: "Ҳа, ота- онанг ҳаққига дуо қиласан, яқинлари билан борди- келди қиласан ва дўстларига икром кўрсатасан", дедилар.
Расулуллоҳ солаллоҳу алайҳи васаллам тавсия этган юқоридаги амаллар ота- оналар ҳаётлик чоғи ва вафотларидан кейин амалга ошириладиган яхши, савоб амаллардир.
Қадимда: "Оталарингизга яхшилик қилинг, шунда фарзандларингиз ҳам сизларга яхшилик қилишади", деб айтилган.
Ҳадисдан ўрганганларимиз
- Ота- она тирик бўлганида ҳам, вафот қилганидан кейин ҳам яхшилик қилишнинг аҳамияти.
- Мусулмон киши ота- оналари яқин муомалада бўлган кишиларга ҳам яхшилик қилишга тарғиб қилади.
- Ислом дунё ва охират ўртасини боғлайди.