666.1343. Жобир ибн Абдуллоҳ розияллоҳу анҳумодан ривоят қилинади:

«Набий соллаллоҳу алайҳи васаллам Уҳуд қурбонларидан икки кишини битта эн кийимга* кафанлаб, кейин: «Қай бири Қуръонни кўпроқ ёд олган?» дер эдилар. Қайси бирига ишора қилинса, лаҳадга аввал ўшани қўяр эдилар. У зот: «Буларга қиёмат куни мен гувоҳман», дедилар. Уларни қони билан дафн этишга амр қилдилар. Улар ювилмади ва уларга жаноза ҳам ўқилмади».

* Бу ерда «бир эн кийимга кафанлаш» деганда ҳозирги пайтдагидек бошдан-оёқ ўраб кафанлаш эмас, балки матони маййитнинг устига ташлаб, ёпиб қўйиш тушунилади. Чунки шаҳидлар кийими билан дафн қилинади, аммо мазкур шаҳидларнинг кийимлари юпун бўлганидан жанг асносида кийимлари йиртилиб, баданлари очилиб қолган эди. Мато танқислиги сабабли икки кишини бир матога кафанлаб кўмилган.

Изоҳ: Имом Авзоъий, Абу Ҳанифа ва бошқа кўпгина мужтаҳидлар шаҳидлар ювилмаса ҳам, уларга жаноза ўқилади, дейишган ва бунга Набий алайҳиссаломнинг Уҳуд шаҳидларига жаноза ўқиганлари ҳақидаги қуйидаги ва бошқа ҳадисларни далил қилиб келтиришган.