784. Анас розияллоҳу анҳудан ривоят қилинади:

«Набий соллалоҳу алайҳи васаллам кишини тик туриб ичишдан қайтардилар».

(Ровий) Қатода айтади: Биз Анасга: «(Тик туриб) ейиш-чи?» деган эдик, у: «Бу ундан ҳам ёмонроқ» ёки «ёқимсизроқ», деди».

Имом Муслим ривояти.

Имом Муслимнинг бошқа ривоятида: «Набий соллалоҳу алайҳи васаллам тик туриб ичишдан зажр қилдилар», бўлиб келган.

Шарҳ: Уламо аҳли ичимликни тик туриб ёки ўтириб ичиш ҳақида келган ривоятларнинг ҳаммасини жамлаб, таққослаб, бошқа сабабларини ҳам топиб ўрганиб чиққанларидан кейин ўтириб ичиш мустаҳабдир, тик туриб ичиш эса, баъзи вақтларда жоиздир, деганлар.

Бу ерда зажр қилдилар деганда, ҳаром қилинди маъносида эмас, балки баъзи вақтларда жоиз деган маънодадир.