847. Ибн Умар розияллоҳу анҳудан ривоят қилинади:

Расулуллоҳ соллаллоҳу алайҳи васаллам қуйидагича дуо қилиб, мажлисдан туриб кетардилар:

«Аллоҳуммақсим ланаа мин хошятика маа яҳуулу байнанаа ва байна маъсиятика ва мин тоатика маа тубаллиғунаа биҳи жаннатака ва минал яқийни маа юҳаввину ъалайнаа масоибад дуня. Аллоҳумма маттиъна биасмааъина ва абсооринаа ва қувватинаа маа аҳяйтанаа, важъалҳул воориса миннаа важъал са`рона ъалаа ман золаманаа вансурнаа ъалаа ман ъааданаа, валаа тажъал мусийбатанаа фий дийнинаа, валаа тажъалид дуня акбаро ҳамминаа валаа маблағо ъилминаа валаа тусаллит ъалайнаа ман лаа ярҳамунаа».

(Маъноси: «Аллоҳим, Сенга қилинадиган гуноҳ билан бизнинг орамизни тўсадиган қўрқувни ва жаннатингга етказадиган тоатингни ҳамда дунё мусибатларини бизга енгиллаштирадиган яқийнни (тўла ишончни) улуш қилиб бер. Аллоҳим, бизни тириклигимизда қулоғимиз, кўзимиз ва қувватимиз билан нафлантириб, уни бизга меросхўр қил (Яъни, вафот этгунимизча омонда қил). Ўчимизни бизга зулм қилганларга қарат! Душманларимиз зиёнига бизга нусрат бер. Мусибатимизни динимизда қилма. Дунёни энг катта ғамимиз ва охирги илмимиз қилма. Ва бизга раҳм қилмайдиганларни бизга бошлиқ этма».)

Имом Термизий ривоят қилиб, ҳасан ҳадис, дедилар.

Шарҳ: Аллоҳдан ҳақиқий қўрқадиган киши Аллоҳнинг улуғлигини билиши орқали бўлади. Шунинг учун Аллоҳ таоло: « Аллоҳдан бандалари ичидан фақат олимларигина қўрқарлар» (Фотир сураси, 28-оят).

Кишининг Аллоҳни таниши кўпайгани сари, У Зотдан қўрқиши ҳам зиёдалашиб бораверади. Пайғамбар алайҳиссалом: «Мен сизларнинг орангизда Аллоҳни кўп билувчи ва қаттиқ қўрқувчингизман», деб айтганлар.

– Банда билан гуноҳ ва маъсиятни орасини тўсувчи Аллоҳдир. Яъни, у билан гуноҳ орасини Аллоҳдан қўрқиш тўсади.

– Тоат-ибодатга тавфиқ берилиши ҳам Аллоҳ томонидандир. Шунинг учун банда учун доим Аллоҳдан ёрдам сўраб туриши лозим.

– Жаннатга тоат-ибодатчалик бошқа бирор нарса етказиб олиб бормайди.

– Банда дунё мусибати қаршисига содиқ иймондан отилиб чиққан яқиний ишонч билангина пешвоз чиқа олади.

– Неъматнинг боқий қолиши ва бардавом бўлишини ҳамда ундан ҳузурланишни гуноҳ ва маъсиятсиз талаб қилинади.

– Кофирларга қарши дуони умумлаштириб, Аллоҳдан уларга қарши ғалаба қозонишини талаб қилиш жоизлиги.

– Банда дучор бўладиган энг буюк мусибат у диндаги мусибатдир.

– Ким дунёга машғул бўлса, қалбидан унинг муҳаббати жойлашиб қолади. Бор ғами дунё бўлиб, охиратни унутади, бор кучи билан дунёга машғул бўлиб қолади.