877. Умму Ҳонеъ Фохитата бинти Аби Толиб розияллоҳу анҳодан ривоят қилинади:

«Фатҳ куни Набий соллаллоҳу алайҳи васалламнинг ҳузурларига борсам, у зот ғусл қилаётган эканлар. Фотима розияллоҳу анҳо эса у зот тўсиб турган эканлар. Мен салом бердим...» деб ҳадиснинг қолганини зикр қилдилар.

Имом Муслим ривояти.

Шарҳ: Агар фитна бўлишдан қўрқилмаса аёлни эркак кишига салом бериши жоизлиги.

Ҳадиснинг тўлиқ шакли қуйидаги бўлган:

Умму Ҳоний бинт Абу Толиб розияллоҳу анҳо айтади:

«Фатҳ йили Расулуллоҳ соллаллоҳу алайҳи васалламнинг ҳузурларига бордим. У зот ғусл қилаётган эканлар. Қизлари Фотима у зотни бир кийимлик билан тўсиб турар эди. Салом бердим. У зот: «Ким бу?» дедилар. «Умму Ҳоний бинт Абу Толиб», дедим. «Марҳабо, Умму Ҳоний!» дедилар. Ғусл қилиб бўлгач, туриб, битта кийимга ўралиб олган ҳолда саккиз ракъат намоз ўқидилар. Тугатгач, «Эй Аллоҳнинг Расули, онамнинг ўғли Алий ибн Абу Толиб мен ҳимоямга олган Ҳубайранинг ўғли фалончини ўлдирмоқчи», дедим. У зот: «Сен ҳимоянгга олган кишини биз ҳам ҳимоямизга олдик, эй Умму Ҳоний», дедилар. Ўшанда чошгоҳ пайти эди».