98. Абу Ҳурайра розияллоҳу анҳудан ривоят қилинади:

Расулуллоҳ соллаллоҳу алайҳи васаллам:

«Етти нарса (келишидан олдин) яхши амалларни қилиб қолишга шошилинглар. Бунда сизлар қуйидаги нарсаларни кутасизлар, холос: 1) Камбағаллик – бу ҳамма нарсани унуттириб юборади. 2) Бойлик – туғёнга кетишликка сабабчидир. 3) Беморлик – барча нарсани фасод қилади. 4) Қарилик – ҳамма нарсани хотирдан чиқариб юборади. 5) Ўлим – тамом қилиб тезлатувчи. 6) Дажжол – кутилаётган ғоиб нарсаларнинг энг ёмони. 7) Қиёмат – фалокатларнинг энг оғири ва аччиғидир», дедилар.

(Изоҳ: Инсон мана шу етти нарса келмасидан олдин вақтни ғанимат билиб, охират учун тайёргарлигини қилиб қўймоғи лозим.)

Имом Термизий ривояти.

Шарҳ: Алоий роҳимаҳуллоҳ айтадилар:

Ушбу хабарни айтилишидан мақсад бу офатлар юзага келиб, ҳамла қилишидан аввал яхши амалларни бошлашга тарғибдир. Зеро Расулуллоҳ с.а.в. мана шу нарсаларни ғанимат билиб, қўлга киритишда намуна бўлгандирлар. У зот Аллоҳнинг розилигини истаб, ҳатто ибодатда тик тураверганларидан икки оёқлари шишиб кетган.